இயற்கை விவசாயத்திற்கு மாறுவதற்கு இலங்கையிடமிருந்து பாடங்கள் கற்றுகொள்ளும் கேரளா

கடந்த சில வாரங்களாக கேரளா மாநிலத்தில் எதிரொலித்த ஒரு கேள்வி, இலங்கையில் ஏற்பட்டுள்ள பொருளாதார நெருக்கடியில் இருந்து கேரளா ஏதாவது கற்றுக்கொள்ள வேண்டுமா என்பதுதான். பல விஷயங்களில் கேரளாவின் நீட்சியாகக் கருதப்படும் அண்டை நாட்டின் பொருளாதார நெருக்கடியிலிருந்து மாநிலம் பாடம் கற்க முடியும் என்று நிதியமைச்சர் கே.என்.பாலகோபால் வெளிப்படையாக ஒப்புக்கொண்டார்.

இயற்கை விவசாயத்திற்கு மாறுதல், இரசாயன உரங்களைப் புறக்கணித்தல் போன்ற தவறான கொள்கைகளால் இலங்கையில் விவசாய உற்பத்தி மற்றும் தேயிலையின் ஏற்றுமதி வருமானம் கடுமையாக வீழ்ச்சியடைந்துள்ளதாக தகவல்கள் தெரிவிக்கின்றன. ஜீரோ பட்ஜெட் இயற்கை விவசாயத்தின் தந்தை என்று அழைக்கப்படும் சுபாஷ் பாலேகர் ஊக்குவித்த இரசாயனமற்ற இயற்கை விவசாயத்தில் இருந்து ஒரு இலையை எடுத்து, சுமார் 82,000 ஹெக்டேர் விவசாய நிலங்களை இயற்கை விவசாயத்தின் கீழ் கொண்டு வருவதால் கேரளாவும் ஓரளவுக்கு அதை செய்ய திட்டமிட்டுள்ளது.

வேளாண்மைத் துறையின் தரவுகளின்படி, ‘சுபிக்ஷம் சுரக்ஷிதம் – பாரதிய பிரகார்த்திக் கிருஷி பாததி’ (கேரள வேளாண் சூழலியல் அடிப்படையிலான பல்லுயிர்ப் பாதுகாப்பு) திட்டத்தின் கீழ் நிர்ணயம் செய்யப்பட்ட 82,000 ஹெக்டேர் இலக்கில், 57,000 ஹெக்டேரில் விவசாயம் இயற்கை முறைக்கு மாற்றப்பட்டது. மார்ச் 2022 இல், சுமார் 22.27 கோடி செலவழிக்கப்பட்டது, இதில் 40% மாநில அரசும் மீதியை மத்திய அரசும் ஏற்றுக்கொண்டது.

வேளாண் பொருளாதார நிபுணரும், கேரள வேளாண் பல்கலைகழகத்தின் முன்னாள் ஆராய்ச்சி இயக்குநருமான பி.இந்திரா தேவி, “நவீன விவசாயத்தில் ஏற்பட்டுள்ள தொழில்நுட்ப முன்னேற்றங்களைக் கவனிக்காமல், திடீரென இயற்கை விவசாயத்துக்கு மாநிலம் முற்றிலும் மாற வேண்டும் என்று நான் கூறமாட்டேன். ஆனால், அறிவியல் முறைகளில் இருந்து படிப்பினைகளை உள்வாங்கி, இயற்கை வேளாண்மையில் பரிசோதனை செய்வதற்கான வாய்ப்பு அரசுக்கு உள்ளது. நாம் ஒரு புதிய முறையைப் பின்பற்றும் போதெல்லாம், நீண்டகால சமூக மற்றும் சுற்றுச்சூழல் தாக்கத்தை கருத்தில் கொள்ள வேண்டும்.